Fyrsta skóflustunga tekin að lagningu háspennustrengs vegna Dýrafjarðarganga

23. maí 2017 kl. 15:01

Í síðustu viku var fyrsta skóflustunga tekin að lagningu 11 kV háspennustrengs, sem til að byrja með mun þjóna verktökum við Dýrafjarðagöng. Gámþjónusta Vestfjarða sér um framkvæmd verksins og Tækniþjónusta Vestfjarða mun sinna eftirliti.

Um er að ræða 11.5 km langan jarðstreng sem sinnir mikilvægu hlutverki vegna vinnubúða og framkvæmda í Dýrafjarðargöngum. Eftir að framkvæmdum við göngin lýkur verður strengurinn nýttur til að flytja raforku frá Mjólká að Þingeyri.

Í sömu framkvæmd verður sá hluti einfasa loftlínu, sem liggur frá Hvammi að Dýrafjarðarbrú fjarlægður, og nýr rafstrengur mun leysa loftlínuna af hólmi. Þá mun Neyðarlínan leggja ljósleiðara meðfram jarðstrengnum og því mun  íbúum á þessu svæði gefast kostur á tengingu við ljósleiðara innan tíðar. Áætluð verklok eru í ágústmánuði á þessu ári.

Opnir kynningarfundir á Hólmavík og Patreksfirði

22. maí 2017 kl. 14:41

Orkubú Vestfjarða verður með opna kynningarfundi á Hólmavík og Patreksfirði í tengslum við ársfund OV, sem haldinn var 16. maí sl.

- Opinn fundur á Hólmavík verður á Café Riis mánudaginn 29. maí kl. 12:00. 

- Opinn fundur á Patreksfirði verður á Fosshótel Vestfirðir þriðjudaginn 30. maí kl. 12:00.

Fundirnir eru öllum opnir og verður fundargestum boðið upp á súpu og kaffi á staðnum.

Viðskiptavinir, sveitarstjórnarmenn og annað áhugafólk um orkumál er hvatt til að mæta á fundinn.

Frá opnum ársfundi á Ísafirði
Frá opnum ársfundi á Ísafirði

Góð mæting á opinn ársfund Orkubús Vestfjarða

17. maí 2017 kl. 09:09

Opinn ársfundur Orkubús Vestfjarða var haldinn 16. maí í tengslum við aðalfund félagsins sama dag.

Á fundinum fór formaður stjórnar Orkubúsins Viðar Helgason yfir málefni félagsins frá sjónarhóli stjórnar, en Elías Jónatansson, orkubússtjóri greindi frá helstu verkfefnum síðasta rekstrarárs og þeim verkefnum sem eru á döfinni hjá Orkubúinu á árinu 2017.  Góð mæting var á fundinn en fundarmönnum var boðið upp á hádegismat undir umræðum.  Að framsögum loknum var opnað á fyrirspurnir frá fundarmönnum og urðu nokkrar umræður í kjölfarið. Ársskýrsla Orkubús Vestfjarða árið 2016 er komin á vefinn og er þar að finna gott yfirlit um reksturinn og starfsemina á árinu.

Hagnaður af rekstri Orkubús Vestfjarða var 96,5 milljónir króna á árinu 2016,  en rekstrarhagnaður fyrir afskriftir og fjármagnsliði  (EBITDA) var 487  milljónir króna.  Veltufé frá rekstri var 502 milljónir króna.  Heildareignir Orkubús Vestfjarða nema 8,2 milljörðum króna, en skuldir og skuldbindingar 2,4 milljörðum.  Eigið fé félagsins er 5,8 milljarðar eða 71% og eiginfjárstaðan er því sterk.

Í máli orkubússtjóra kom fram að helstu áskoranirnar sem Orkubúið stendur frammi fyrir eru aukin arðsemi félagsins og aukning á eigin orkuöflun.

Opinn ársfundur Orkubús Vestfjarða 2017

9. maí 2017 kl. 15:44
Jarðstrengur plægður niður
Jarðstrengur plægður niður

Ársfundur Orkubús Vestfjarða ohf verður haldinn þriðjudaginn 16. maí n.k.

Fundurinn verður haldinn á Hótel Ísafirði og hefst kl. 12:00, en einnig verða haldnir kynningarfundir með svipuðu sniði á Hólmavík og á Patreksfirði fljótlega á eftir. Á fundinum munu Viðar Helgason, stjórnarformaður OV og Elías Jónatansson, orkubússtjóri fara yfir helstu þætti í rekstri Orkubús Vestfjarða rekstrarárið 2016. Þá verður farið yfir hvað hefur áunnist og það helsta sem er á döfinni hjá fyrirtækinu. Fundarmenn munu fá tækifæri til að bera fram fyrirspurnir eftir að framsögum lýkur.

Ársfundurinn er öllum opinn og verður fundargestum boðið upp á súpu á staðnum.

Ráðgert er að fundinum ljúki um kl. 13:30.

Viðskiptavinir, sveitarstjórnarmenn og annað áhugafólk um orkumál er hvatt til að mæta á fundinn.

Stjórn Orkubús Vestfjarða ohf.

 

 

Orkubú Vestfjarðar verður aðalstyrktaraðili Fossavatnsgöngunnar

29. mars 2017 kl. 07:56
Frá undirritun samnings við Fossavatnsgönguna
Frá undirritun samnings við Fossavatnsgönguna

Í gær, 28.3.2017, skrifuðu forsvarsmenn Fossavatnsgöngunnar undir samning við Orkubú Vestfjarða.

Orkubúið hefur stutt gönguna undanfarin ár en eykur nú við framlag sitt og verður annar af aðalstyrktaraðilum göngunnar. Orkubúið og Fossavatnsgangan gerðu 4 ára samning.

„Það er ánægjulegt að sjá að þessi tvö öflugu fyrirtæki séu tilbúin í að taka þátt í þessum flotta viðburði sem við höfum byggt upp hér á Ísafirði. Þessir samningar eru okkur afar miklilvægi ekki bara fjárhagslega heldur líka af þeirri ástæðu að fyrirtækin sjái sér hag í að tengjast göngunni.“ segir Kristbjörn R. Sigurjónsson, framkvæmdastjóri göngunnar.

„Það er ánægjulegt fyrir Orkubúið að geta tengst skíðaíþróttinni og Fossavatnsgöngunni með enn betri hætti en áður. OV vill vera bakhjarl á sínu starfsvæði og vekja athygli á því öfluga mannlífi sem hér er. Fossavatnsgangan er slíkt verkefni. Ekki skemmir svo fyrir að gangan fer fram á starfsvæði félagsins, þ.e. fjalllendi Skutulsfjarðar og gengið er á snjó sem breytist svo í vatn og í framhaldinu raforku sem OV selur“ segir Elías Jónatansson Orkubússtjóri.

Á meðfylgjandi mynd má sjá forsvarsmenn göngunnar og Orkubús Vestfjarða við undirritun samningsins og í númerum, sem notuð verða í göngunni í ár.

Eldri færslur