1. Tilgangur og umfang
Lögð er áherslu á að tryggja jafna stöðu allra starfsmanna eins og kveðið er á um í lögum um jafna stöðu og jafnan rétt allra starfsmanna óháð kyni, kynvitund, kyntjáningu, aldri, uppruna, fötlun, trú eða öðrum persónubundnum þáttum. Stuðlað er að góðri líðan starfsmanna í starfi og áhersla lögð á samræmingu fjölskyldulífs og starfs. Þá er lögð áhersla á mikilvægi þess að nýta til jafns þá auðlegð sem felst í menntun, reynslu og viðhorfum allra starfsmanna.
Umfang fyrirtækisins er framleiðsla, dreifing, flutningur og sala rafmagns og heits vatns á Vestfjörðum ásamt sölu á rafmagni um allt land. Lögð er áhersla á fjölbreytt og sanngjarnt vinnuumhverfi þar sem hæfni, þekking og frammistaða ráða för í ráðningum, starfskjörum og framgangi í starfi.
Áætlunin gildir fyrir allt starfsfólk fyrirtækisins.
2. Ábyrgð og eftirfylgni
Orkubússtjóri ber ábyrgð á að jafnréttisáætluninni sé framfylgt og stjórnendur bera sameiginlega ábyrgð á framgangi jafnréttismála í samræmi við áætlunina.
3. Framkvæmd
3.1 Líðan starfsmanna.
Allir starfsmenn eiga rétt á því að komið sé fram við þá af virðingu og að þeir sæti ekki kynbundinni eða kynferðislegri áreitni, einelti eða ofbeldi í hvaða mynd sem er. Þá skulu starfsmenn ekki baktala hvern annan heldur koma fram að hreinskilni og koma skilaboðum um ágalla og þörf á úrbótum á framfæri við rétta aðila. Verði starfsmaður fyrir einhvers konar misrétti getur hann leitað til orkubússtjóra/stjórnarformanns sem ber að leiðbeina honum í slíkum málum og veita nauðsynlega aðstoð. Þolandinn skal engan skaða bera af ráðstöfunum sem gripið er til í því skyni. OV hefur sett sér stefnu og gert viðbragðsáætlun gagnvart einelti innan fyrirtækisins og kynnt skal öllum starfsmönnum.
3.2 Launajafnrétti.
Laun skulu ákveðin á sama hátt fyrir alla starfsmenn, óháð kyni, þannig að sömu viðmið skulu höfð til hliðsjónar við ákvörðun launa fyrir jafnverðmæt og sambærileg störf. Sama á við þegar yfirvinna og hvers konar aðrar þóknanir eru ákvarðaðar, sem og önnur réttindi svo sem lífeyrisgreiðslur, orlof og veikindaréttur. OV hefur innleitt jafnlaunakerfi sem tryggir að allt starfsfólk njóti sömu kjara fyrir sömu störf. Unnið er samkvæmt ÍST 85:2012 jafnlaunakerfi og reglulega er framkvæmd greiningu á launum til að koma í veg fyrir mögulegan kynbundinn launamun.
3.3 Starfsþjálfun, starfsþróun og endurmenntun.
Leitast er við að tryggja jafna stöðu kynja í öllum störfum og stuðla að fjölbreytni innan starfseminnar. Leggja skal áherslu á að allir starfsmenn njóti sömu tækifæra til starfsþróunar, endurmenntunar og starfsþjálfunar og til að sækja námskeið sem leiða til aukinnar hæfni í starfi eða til undirbúnings fyrir önnur störf. Markmiðið er að jafna kynjahlutfall eftir því sem unnt er, sérstaklega í tæknilegum störfum og stjórnunarstöðum. Það er gert með því að nota kynhlutlausar starfslýsingar og auglýsingar, hvetja öll kyn til að sækja um störf og meta kynjahlutföll í ráðningum árlega. Þess skal gætt að sá umsækjandi sem metinn er hæfastur til þess að gegna starfi sé ráðinn, án tillits til kynferðis.
3.4 Samræming vinnu og einkalífs.
Gerðar eru nauðsynlegar ráðstafanir til að gera öllum starfsmönnum kleift að samræma starfsskyldur sínar og skyldur gagnvart fjölskyldu. Ráðstafanir þær skulu m.a. miða að því að auka sveigjanleika í skipulagningu á vinnu og vinnutíma þannig að tekið sé tillit til þarfa fyrirtækisins og fjölskylduaðstæðna starfsmanna. Markmiðið er að starfsfólk hafi raunhæfan möguleika á að nýta foreldraorlof, jafnan rétt foreldra til fæðingarorlof og stuðning við starfsfólk við endurkomu til vinnu eftir orlof.
3.5 Kynning.
Jafnréttisáætlunin skal kynnt fyrir starfsmönnum fyrirtækisins, áætlunin skal vera kynnt árlega á sama tíma og útkoma úr jafnlaunagreiningu er kynnt. Nýjum starfsmönnum skal kynna efni áætlunarinnar.