Ráðherra kynntar tillögur um orkumál á Vestfjörðum

08. apríl 2022

Skýrsla starfshóps um raforkumál á Vestfjörðum

Mörg áhersluverkefni hafa verið sett af stað í umhverfis-, orku- og loftslagsráðuneytinu til að stuðla að bættu orkuöryggi til lengri og skemmri tíma. Þetta kom fram í ávarpi Guðlaugs Þórs Þórðarsonar, umhverfis-, orku- og loftslagsráðherra á málþingi um orkumál á Vestfjörðum.

Sagði ráðherra vilja stjórnvalda standa til þess að efla stöðu orkumála á Vestfjörðum og að í þingsályktun um stefnu stjórnvalda um uppbyggingu flutningskerfis raforku sé sérstök áhersla lögð á Vestfirði.

Þáverandi ráðherra orkumála, Þórdís Kolbrún Reykfjörð Gylfadóttir, skipaði í fyrra starfshóp um orkumál á Vestfjörðum og kynnti hópurinn í dag tillögur sínar um lausnir í orkumálum á Vestfjörðum fyrir ráðherra. Starfshópurinn sem var skipaður heimamönnum og sérfræðingum var fenginn til þess að greina stöðuna heildstætt og fara yfir mögulegar lausnir til úrbóta í raforkumálunum.

Starfshópurinn leggur áherslu á að vinna að úrbótum og verkefnum sem snerta nánast alla hluta raforkukerfisins. Er í tillögum hópsins fjallað um virkjanakosti á Vestfjörðum, flutning og dreifingu raforku og framtíðarspá um orkunotkun svæðisins.

„Í framtíðarsýn orkustefnunnar segir að orkan eigi að vera hreyfiafl fjölbreyttrar atvinnustarfsemi með jöfnum aðgangi á landsvísu. Þar er einnig að finna metnaðarfull markmið um kolefnishlutleysi og full orkuskipti fyrir árið 2040,“ sagði Guðlaugur Þór og minnti á stöðuskýrslu um ástand orkumála sem kom út í síðasta mánuði og þátttöku landshlutasamtaka í þeirri vinnu.  „Þar er að finna greinargott yfirlit yfir orkumálin. Í sviðsmyndum þeirrar skýrslu blasir við okkur gríðarstórt verkefni sem er að anna aukinni eftirspurn eftir orku fyrir orkuskiptin framundan, í formi raforku eða rafeldsneytis.“

Stjórnvöld leysi þó fá mál ein og óstudd, heldur þurfi þátttöku samfélags og atvinnulífs til að koma góðum málum áfram. „Það er líka einmitt svo að bestu hugmyndir eru hjá þeim standa nærri vandanum, hafa skýra yfirsýn og brenna fyrir umbótum á sviðinu til að bæta sitt nærsamfélag.“

28. júlí 2022

Úthlutun samfélagsstyrkja Orkubús Vestfjarða 2022

Orkubú Vestfjarða hefur úthlutað samfélagsstyrkjum 2022.

28. júlí 2022

Ný 150 kW. hraðhleðslustöð í Bjarkalundi

Í dag var tekin í notkun hjá Orkubúi Vestfjarða sjötta hraðhleðslustöðin, það er 150 kW. stöð...

07. júlí 2022

Lagning jarðstrengja í dreifbýli sumarið 2022

Orkubú Vestfjarða áætlar samkvæmt venju að plægja niður jarðstrengi í sumar.  Líkt og undanfarin...