Elías Jónatansson ráðinn orkubússtjóri

11. mars 2016

orkubusstjori_elias.jpgStjórn Orkubús Vestfjarða ohf. hefur ákveðið að ráða Elías Jónatansson bæjarstjóra í Bolungarvík í starf orkubússtjóra frá 1. júlí n.k.

Elías lauk prófi í vélaverkfræði frá Háskóla Íslands árið 1983 og M.Sc. prófi í iðnaðarverkfræði frá Oregon State University árið 1986. Elías hefur víðtæka reynslu af stjórnunarstörfum og sérfræðistörfum hjá ýmsum framleiðslufyrirtækjum, s.s. Einari Guðfinnssyni hf., Gná hf. og Sindrabergi hf. en frá árinu 2008 hefur hann verið bæjarstjóri í Bolungarvík. Elías var formaður stjórnar Lífeyrissjóðs Bolungarvíkur 2005-2006, hefur setið í stjórn Frjálsa lífeyrissjóðsins frá 2007, í stjórn Íslandspósts 1998-2008 ofl.

Starf orkubússtjóra var auglýst laust til umsóknar í febrúarmánuði. Alls bárust 25 umsóknir um starfið og naut stjórn Orkubús Vestfjarða ráðgjafar Hagvangs við mat umsókna.

Orkubú Vestfjarða ohf. var upphaflega stofnað árið 1978 en var gert að hlutafélagi á grundvelli laga sem samþykkt voru á Alþingi 2001.

Kristján Haraldsson sem hefur gengt starfi orkubússtjóra frá stofnun félagsins mun láta af störfum 1. júlí n.k.

Starfssvið Orkubús Vestfjarða snýr að virkjun vatnsafls og jarðhita og dreifingu og sölu raforku. Fyrirtækið á og rekur orkuver og raforkustöðvar til raforkuframleiðslu, ásamt nauðsynlegum mannvirkjum til raforkuflutnings og raforkudreifingar, jarðvarmavirki og fjarvarmakyndistöðvar ásamt nauðsynlegu dreifikerfi. Starfsmenn Orkubúsins eru um 70 á þremur starfssvæðum og þjónusta þeir dreifikerfi fyrir Vestfirði og sölukerfi, sem nær til landsins alls. Aðalskrifstofa er á  Ísafirði og svæðisskrifstofur á Hólmavík og Patreksfirði.

11. mars 2016.

11. maí 2022

Orkubú Vestfjarða styður Skjaldaborgarhátíðina

Skjaldborg – hátíð íslenskra heimildamynda og Orkubú Vestfjarða endurnýjuðu á dögunum...

08. apríl 2022

Ráðherra kynntar tillögur um orkumál á Vestfjörðum

Mörg áhersluverkefni hafa verið sett af stað í umhverfis-, orku- og loftslagsráðuneytinu til...

08. apríl 2022

Útboð - Óskað eftir tilboðum í lagningu jarðstrengja og hitaveitulagna.

Orkubú Vestfjarða ohf. óskar eftir tilboðum í lagningu jarðstrengja...