Frá Stjórn Orkubús Vestfjarða

04. janúar 2013

Í framhaldi af óveðri því er gekk yfir Vestfirði og stóran hluta landsins síðustu daga nýliðins árs óskar stjórn Orkubús Vestfjarða að koma eftirfarandi á framfæri.

Stjórn Orkubúsins er þakklát starfsmönnum þess fyrir þá miklu vinnu sem þeir hafa lagt á sig undanfarið við erfiðar aðstæður til að tryggja raforkuframleiðslu og flutning. Jafnframt skal komið þakklæti á framfæri til þeirra fjölmörgu aðila; einstaklinga, björgunarsveitafólks, lögreglu, Vegagerðar og annarra sem aðstoðuðu starfsmenn Orkubúsins þessa daga. Það hefur án efa reynt á marga að þurfa að berjast í óblíðu íslensku vetrarveðri við að reyna að tryggja íbúum á þjónustusvæði Orkubúsins orku, kraft og yl.

Líkt og áður hefur verið fjallað um í fjölmiðlum var hér við að eiga eitthvað versta veður sem gengið hefur yfir Vestfirði um árabil og því miður olli það umtalsverðum bilunum í dreifikerfi Orkubúsins og Landsnets á Vestfjörðum. Veðurofsinn gerði ómögulegt að bregðast við því, enda voru allar samgöngur úr lagi milli byggðarlaga, hvað þá á fjöllum. Óvæntar bilanir í varaaflstöðvum auk bilunar í spenni á Ísafirði bættu ekki úr skák.

Stjórn Orkubús Vestfjarða harmar að ekki hafi verið unnt að þjónusta viðskiptavini í samræmi við væntingar þeirra á meðan að óveðrið gekk yfir og að íbúum hafi ekki fundist upplýsingagjöf fyrirtækisins nægileg.

Nú þegar raforkudreifing er að komast í eðlilegt horf, munu starfsmenn Orkubúsins fara yfir atburðarrás síðustu daga og meta hvað fór úrskeiðis og af hverju. Stjórn og stjórnendur Orkubúsins munu síðar í mánuðinum fara yfir niðurstöður þeirrar greiningar og á grundvelli hennar endurmeta verklag til að auka áreiðanleika þeirrar mikilvægu þjónustu sem Orkubúið veitir við dreifingu og framleiðslu raforku og við upplýsingagjöf.

Fyrirhuguð er endurnýjun Fossárvirkjunar á þessu ári, sem mun tryggja nokkra aukningu í raforkuframleiðslu á Ísafirði og þannig auka afhendingaröryggi þar nokkuð. Jafnframt er verið að meta áætlanir Orkubúsins um fjárfestingar í raforkukerfum og virkjunum næstu ár, en þar mun aukin þrífösun í dreifbýli og afhendingaröryggi verða meðal áherslna, þótt takmörk séu fyrir fjárfestingargetu þar sem dreifingarkostnaður raforku í dreifbýli er mikil og erfitt að velta kostnaði af viðbótarfjárfestingum á notendur, þótt það sé vegna endurbóta og aukins öryggis.

Jafnframt verður fundað um afhendingaröryggi raforku á fundi með fulltrúum Landsnets á næstu dögum.

Orkubú Vestfjarða mun áfram kappkosta að þjónusta þess verði eins og best verður á kosið og nota reynsluna af atburðum síðustu daga til þess að bæta úr þar sem úrbóta er þörf í samstarfi við hagsmunaaðila.

Fyrir hönd stjórnar Orkubús Vestfjarða,

Viðar Helgason, formaður stjórnar.

09. október 2020

Jafnlaunavottun Orkubús Vestfjarða

Orkubú Vestfjarða hefur hlotið jafnlaunavottun. Jafnlaunastefna Orkubúsins var unnin og samþykkt...

17. september 2020

Tilkynning frá Landsneti og Orkubúi Vestfjarða

Alvarlegt slys í tengivirki í Breiðadal. Rétt fyrir klukkan þrjú í dag varð alvarlegt rafmagnsslys...

04. september 2020

Orkuvitund

Orkubú Vestfjarða hefur unnið að því, síðustu mánuði, að færa reikningagerðina fyrr í mánuðinn,...