Ársreikningur Orkubús Vestfjarða ohf fyrir árið 2018 var samþykktur á aðalfundi félagsins í gær 21. maí. Hagnaður eftir skatta nam 244 milljónum króna, en veltufé frá rekstri var 711 milljónir. Fjárfest var fyrir 682 milljónir á árinu 2018. Heildartekjur félagsins voru 2800 milljónir króna og jukust um 9% á milli ára, en gjöld hækkuðu um 6,5%. Heildareignir nema nú um 8,8 milljörðum króna en eigið fé Orkubús Vestfjarða er 6,1 milljarður króna eða 69% af heildarfjármagni.
Heildarorkuöflun var 267 GWst og hafði aukist um 3% frá fyrra ári. Eigin raforkuframleiðsla Orkubúsins nam 95 GWst, en jarðhitavinnsla nam 17 GWst.
Raforkukaup frá öðrum námu 152 GWst, þar af voru raforkukaup hitaveitu 87 GWst.
Á fundinum vorku kjörin í stjórn félagsins þau Illugi Gunnarsson, Friðbjörg Matthíasdóttir, Elsa Kristjánsdóttir, Gísli Jón Kristjánsson og Ingibjörg Benediktsdóttir.
Fjölmenni sótti ársfund Orkubúsins sem haldinn var strax í kjölfar aðalfundarins. Þar voru kynntar helstu stærðir í ársreikningi auk þess sem farið var yfir starfsemi félagsins á árinu 2018 og verkefnin framundan. Ennfremur var á fundinum flutt fróðlegt erindi um loftslagsmál og orkuskipti.